ગુજરાત બોર્ડની પરીક્ષાના ફોર્મ ભરવાની જાહેરાત, 4 નવેમ્બરથી 3 ડિસેમ્બર સુધી ભરી શકાશે ઓનલાઈન ફોર્મ
ધોરણ-૧૦ અને ધોરણ-૧૨ ફેબ્રુઆરી-માર્ચ-૨૦૨૭ બોર્ડ પરીક્ષાના આવેદનપત્રો ભરવાની જાહેરાત
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB), ગાંધીનગર દ્વારા આગામી ફેબ્રુઆરી-માર્ચ-૨૦૨૭માં યોજાનાર ધોરણ-૧૦ અને ધોરણ-૧૨ ની જાહેર પરીક્ષાના આવેદનપત્રો (ફોર્મ) બાબતે મહત્વની અખબારી યાદી જાહેર કરવામાં આવી છે.
બોર્ડ દ્વારા જાહેર કરવામાં આવેલી વિગતો મુજબ, રાજ્યની તમામ માન્ય માધ્યમિક અને ઉચ્ચતર માધ્યમિક શાળાઓના સંચાલકો, આચાર્યો, શિક્ષકો, વહીવટી કર્મચારીઓ, વાલીઓ અને વિદ્યાર્થીઓએ આ સમયમર્યાદા ધ્યાનમાં રાખીને સમયસર ઓનલાઈન ફોર્મ ભરવાના રહેશે.
મહત્વની તારીખો અને સમયગાળો:
- ઓનલાઈન ફોર્મ ભરવાની શરૂઆત: ૦૪/૧૧/૨૦૨૬, બપોરે ૧૨:૦૦ કલાકથી
- ઓનલાઈન ફોર્મ ભરવાની અંતિમ તારીખ: ૦૩/૧૨/૨૦૨૬, રાત્રીના ૧૨:૦૦ કલાક સુધી
- અધિકૃત વેબસાઇટ: gseb.org
કયા વિદ્યાર્થીઓએ ફોર્મ ભરવાના રહેશે?
આ વર્ષે નીચે જણાવેલ ધોરણો અને પ્રવાહોના તમામ નિયમિત તેમજ અન્ય વિદ્યાર્થીઓએ ફરજિયાતપણે ઓનલાઈન આવેદનપત્ર ભરવાનું રહેશે:
- ધોરણ-૧૦ (નિયમિત, પુનરાવર્તિત/રિપીટર, GSOS રેગ્યુલર, GSOS પુનરાવર્તિત તથા પૃથ્થક વિદ્યાર્થીઓ)
- સંસ્કૃત પ્રથમા
- ધોરણ-૧૨ વિજ્ઞાન પ્રવાહ, સામાન્ય પ્રવાહ, વ્યવસાયલક્ષી પ્રવાહ, ઉ.ઉ.બુનિયાદી પ્રવાહ તથા સંસ્કૃત મધ્યમા (આ તમામ પ્રવાહોના નિયમિત, પુનરાવર્તિત/રિપીટર, GSOS રેગ્યુલર, GSOS પુનરાવર્તિત તથા પૃથ્થક વિદ્યાર્થીઓ)
બોર્ડની સૂચના મુજબ, રેગ્યુલર ફી સાથે ઉપરોક્ત નિર્ધારિત સમયમર્યાદામાં જ બોર્ડની સત્તાવાર વેબસાઇટ gseb.org પરથી જ ફોર્મ ભરવાના રહેશે. આ અંગેની અન્ય જરૂરી સૂચનાઓ અને માર્ગદર્શિકા બોર્ડની વેબસાઇટ પર મૂકવામાં આવશે, જેથી સંબંધિત તમામ લોકોએ સમયસર નોંધ લેવા અને પ્રક્રિયા પૂર્ણ કરવા અનુરોધ કરવામાં આવ્યો છે.
